RIGNING
Rigningin svo mikil
allt í einu að við
rennblotnum við það eitt
að ganga milli veitingastaða
þó stutt sé að fara
Ekkert okkar með
hlífðarföt enda
vorum við að fara
til útlanda
og þar á
að vera sól og blíða
alltaf
Í ókunnri borg
Í SETUSTOFU SNEMMA MORGUNS
Notalegt að sitja
í setustofu hostelsins
snemma morguns
og skrifa
þar til fólk fer á stjá
Opnar dyr
herbergja sinna
Læðist fram
á salerni og í sturtu
Og kyrrðin
sem umlukti
morgunhanann
hverfur
Gufar upp
Á NÆSTA BORÐI
Á næsta borði
drekka tvær eldri konur
bjór um miðjan dag
og spjalla saman
Heyrist sænska kennara
bera á góma
Án þess
ég sé að hlusta
KONA HORFIR Á MIG
Finn
að önnur konan
horfir á mig
meðan
hin bregður sér frá
og undrast
líklega
hvað ég
sé eiginlega
pára
Ég
geri það líka
UPPTEKIÐ
Sætið „mitt”
upptekið
þegar ég kem
aftur á barinn
sem ég var á í gær
svo ég verð
að setjast annars staðar
Mun fleira fólk
hér núna
og hávaðinn meiri
Næ samt
að gleyma mér
í heimi orðanna
sem ég
er svo gjarn
að spinna
utanum mig
og líf mitt
NOTALEGT EITTHVAÐ
Ótrúlega notalegt
eitthvað að
sitja á
kunnuglegum barnum
sem ég
hef komið á
einu sinni áður
Útiloka hávaðan
Flétta utan um sig
brynju af orðum
TEKUR Á MÓTI OKKUR
Brosir
þínu blíðasta
þegar þú tekur
á móti okkur
svo skín
í hvítar
nokkuð stórar
tennur
og glitrar
á tannskrautið
Á LEIÐ Í BÆINN
Hún er ung
og situr ein
í tvöföldu sæti
í vagninum
Notar tímann vel
á langri leiðinni
niður í bæ
Dregur upp
bursta og púðrar
sig í framan
málar sig
og varalitar
Unglingsstúlka
á leið í bæinn
HITTUMST Á RESTURANTI
Höfum ekki sést
í fáeina klukkutíma
þegar við hittumst
á resturantinum
margt
sem þarf að ræða
og sýna
hvað keypt var
Hálf vorkenni fólkinu
sem er á staðnum fyrir
enda tæmist
hann brátt
ÞRJÚ
Þau koma þrjú
tvær stúlkur
einn drengur
inn í setustofuna
Taka fram spilastokk
Spila hljóðlega
Tala svo lágt
að ég sem sit
í sófanum
heyri varla
í þeim
ÞAU SPILA
Hann glottir
og klappar
á kálfa
kærustu sinnar
segir henni
að setja út spil
sem hún gerir
Hann
hirðir slaginn
KOMA Á BAR
Koma tvö
inn á barinn
hjón til margra ára
„Líst okkur á þetta?”
má lesa úr andlitum þeirrra
Þau fá sér bjór
FÉLAGSSKAPUR
Hjónin sem skimuðu um staðinn
hafa fengið félagsskap:
Hjá þeim er sest annað par
önnur hjón
Sitja hvert á móti öðru
með bjór á borðinu milli sín
og spjalla saman á lágu nótunum
Svo virðist sem þau þekkist ekki mikið
Eru jafnvel að sjást í fyrsta sinn
KONA Í STRÆTÓ
Virðist æst eða stressuð
þegar hún kemur
inn í strætisvagninn
Strunsar aftur í hann
og hlammar sér í sætið
Kafar ofan í rósóttu
töskuna sína
dregur eitthvað upp úr henni
sem ég er sit framar
og fylgist með ákveð að sé
einhverskonar lyf eða tafla
gæti allt eins verið tyggjó
Rífur síðan upp
símann sinn og skoðar
Róast
að því er virðist
eftir því sem vagninn
fer lengra
MISSÝN
Sé í svip
mann
sem kemur
inn á barinn
og held
andartak
sé kona
úr mínum hóp
VAGNINN
Stígum upp í vagninn er hann kemur loks
Höfum beðið nokkuð lengi
að okkur finnst
Samt ekki vissir um að þetta sé sá rétti
Vitum þó:
hann ber okkur eitthvert
Vagninn þræðir hverfin
og nemur staðar á hverri stöð
Fáum því útsýnistúr
án þess að ætla
KONAN Í STÍGVÉLUNUM
Konan í stígvélunum
á sússí staðnum
stendur upp þegar hún
er búin að borða
Unnustinn staðinn upp
skömmu áður
stendur á tali við fólk
sem hann þekkir greinilega
nokkuð vel en hefur ekki hitt lengi
Konan í stígvélunum gengur til þeirra
Kærastinn kynnir þau
Um leið og konan í stígvélunum
tekur í hönd þeirra
beygir hún sig ögn í hnjánum
til að hneigja sig
Eins og stúlkum er kennt í dansskóla
RIGNING
Rigningin svo mikil
allt í einu að við
rennblotnum við það eitt
að ganga milli veitingastaða
þó stutt sé að fara
Ekkert okkar með
hlífðarföt enda
vorum við að fara
til útlanda
og þar á
að vera sól og blíða
alltaf
HEIMSÓKN
Þegar við komum
er okkur vísað
inn í skólastofu
þar sem bíður okkar
dúkað borð með kaffi
og vínarbrauði
Og Leifur
sem ekki er Eiríksson
tekur á móti okkur
Skilur okkur ein eftir
meðan hann fer
og sækir fólkið
sem sest við borðið
og spjallar við okkur
Langa hríð
sem þó líður
sem örskot
STÚLKA VIÐ NÆSTA BORÐ
Við næsta borð
situr ung stúlka
með þrem eldri mönnum
Gjóar
af og til
augum á mig
þar sem ég sit
yfir bjór og skrifbók
Get fátt lesið
úr svip hennar
annað en
forvitni og
ef til vill undrun
FYLGIST MEÐ
Út um glugga
fylgist ég með
fólki sem
gengur hjá
barnum
Sumir með rennt
upp í háls
Aðrir með
uppspennta
regnhlíf
Þó
hann hangi þurr
sem stendur
TVÖ Í SPORVAGNI
Þegar við
komum inn
í sporvagninn
sitja þau tvö
hvort á móti öðru
og vínlyktin
fyllir nánast
vagninn allan
Hann:
skeggjaður
með skemmdar tennur
og hund í fanginu
Hún:
hrukkótt
með gleraugu
heldur um
ólina
Ekkert okkar
sest hjá þeim
MAN
Man skyndilega
dökku stelpurnar tvær
með slæður
og rauðlakkaðar neglur
í strætó
Veit ekki
hvaðan þær eru
né hvaðan
upprunnar
Man
þær einungis
GENG UM BORGINA
Geng um borgina
nánast heilan dag
Fyrst í hóp
en
þó undarlegt
megi virðast
dreg ég mig út
Held áfram einn
Sest inn á bari
Drekk bjór
Skrifa
Þannig
vil ég hafa það
og ekki öðruvísi
Á GANGI
Geng eftir götu, einn í ókunnri borg sem ég þekki lítið eftir fjögra daga dvöl.
Á móti mér kemur feitur maður dökkur yfirlitum.
Beygir í átt til mín og nálgast óðfluga.
Virðist eiga við mig erindi.
Og er við stöndum augliti til auglitis segir hann eitthvað sem ég heyri ekki vel og skil því síður.
Ég fórna höndum, segi sorrý.
Hann segir þá aðeins eitt lítið ókei.
Og við göngum hvor í sína áttina.
SEINT AÐ KVÖLDI
Sit í setustofu
hostelsins
seint að kvöldi
jafnvel komin nótt
að sumra mati
Félagarnir allir
farnir að sofa
en ég
lónerinn í hópnum
vef orð
meðan regnið
bylur á þakinu
DROPAR ÚR LOFTI
Hef varla
náð að skoða
þessa borg
af neinu viti
enn
vegna dropana
sem falla
úr lofti
í sífellu
og
orðanna
sem stöðugt
banka uppá