Siglt milli skýja

ÞÖGN

 Í þögn
 skríður bjalla
 eftir gólfi

 Þú
 horfir á hana

 í þögn

 uns
 hverfur
 inn í myrkur

 og
 þögn

 TJÖRNIN

 Renndum okkur
 á ísilagðri tjörn

 Óttuðumst
 það
 sem lá
 á botninum

 Beið færis

 LJÓSFIÐRILDI

 Myrkur

 og
 fáein
 ljósfiðrildi
 fljúga hjá

 Næ
 ekki
 að fanga þau

 HENDUR ÞÍNAR

 Hendur þínar
 kljúfa loftið
 ótt og títt
           sem sverð eða hnífur

 Rifna af

 og
 fljúga brott

 Veist ekki
 hvort þær koma aftur

 og
 stendur á sama

 DANS

 Stígum dans
 um eld
 er logar glatt

 Dönsum
 í takt við
 trumbuslátt

 og
 söngl
 okkar sjálfra

 Áður en
 höldum
 út í óvissuna

 DYR

 Hendur

 róta
 í mold

 Finna ekki

 dyr

 er
 vísa leið

 SKUGGAR

 Sveima skuggar

 yfir
 tærum vötnum
 huga þíns

 sem
 gruggast sífellt

 er
 skuggarnir lengjast

 KYNJAMYNDIR

 Sé
 kynjamyndir
 í þokunni

 sem
 streymir

 úr
 augum þínum

 KVEÐJA

 Geng út

 Veit
 ég á aldrei
 afturkvæmt

 Fer

 og
 kem

 ekki aftur

 DEPURÐ

 Lýstu
 upp myrkrið

 er
 sífellt vakir

 fyrir
 augum mínum

 NÓTTIN GLEYPTI OKKUR

 Nóttin gleypti okkur

 nam á brott
 í hitasvækju

 Hefðum
 annars dansað
 er sólin
 reis að morgni

 Stigið
 á geisla hennar

 BROT

 Er fuglinn
 flaug upp

 fundum við
 brotin

 sem
 við leituðum

 Reyndum
 að raða saman

 Án árangurs

 FISKAR

 Fiskarnir
 í brjóstinu

 horfnir

 Flugu burt
 á vængjum

 er á þá uxu

 VATNSDROPI

 Í lófa
 vatnsdropi

 sem

 þú
 þráir
 að kyssa

 VANMÁTTUR

 Gátum
 ekkert gert

 Stóðum
 einungis stjörf

 Biðum

 þar til
 skall á okkur

 af
 gríðarlegu afli

 ANDVARI

 Um okkur
 lék andvari

 Vissum samt
 að tíminn
 nálgaðist

 óðum

 TÍMI

 Dragðu upp
 á blað
 tímann
 sem leið

 þegar þú
 áttir
 ekki orð

 ANNAR TÍMI

 Dvelur stundum
 í öðru húsi
           öðrum tíma
 en þú hugðir

 Án þess
 þú fáir
 nokkuð að gert

 ÞUNG SPOR

 Hettur
 kuflanna þungu
 hylja
 andlit okkar

 er við
 göngum
         þungstígir
 niður hæðina

 eftir stíg
 sem lagður var
 í árdaga

 SKRÚÐI

 Klæðumst flíkum
 sem við grófum
 af hafsbotni

 Hafa legið
 um aldir

 Skörtum þeim
 sem fegursta skrúða

 NÓTTIN MUN VAKA

 Og nóttin

 hún
 mun vaka

 áður en
 birtan
 flæðir inn
 um glugga þinn

 Er þú
 lítur út
 sérðu sólina

 glotta

 hátt
 á himni

 KENND

 Undir fótum jörð

 sem ég hef
 gengið á

 fram að þessu

 Finnst samt

 ég hafi aldrei
 snert hana

 áður

 HORFNIR DRAUMAR

 Grétum
 draumana sem týndust

 hurfu

 líkt og
 gufuðu upp

 á leið hingað

 NÓTTIN LEIÐ

 Og
 nóttin leið

 sem örskot

 án þess
 við tækjum eftir

 Fyrr en birti

 af
 nýjum degi

 SKÓGUR

 Skógurinn sefur

 Hrotur trjánna
 heyrast
 langar leiðir

 Jafnvel
 alla leið
 hingað
 til mín

 HÚN

 Gengur
 hægum skrefum
 eftir gangstétt

 Styður
 sig við staf

 Man
 er hún hljóp
 sömu stétt

 á eftir
 honum
 sem hvarf
         ævinlega
 fyrir horn

 Vissi
 hún næði honum

 aldrei

 FORTÍÐ

 Hurfum
 nóttina köldu

 Forðum

 Skildum
 ykkur eftir

 ÞRÖNGAR GÖTUR

 Steinlagðar götur
 svo þröngar

 Getum
         næstum
 teygt okkur
 milli húsa

 FÁFARNAR SLÓÐIR

 Gatan hellulögð

 Dökk

 Mætum fáum

 enda

 steint á ferð
 um fáfarnar slóðir

 FLÓÐ

 Áin stóra
 stækkar
 vex

 svo
 allir óttast

 Nema við

 á eyju
 í henni miðri

 KIRKJA

 Svalandi
 að standa
         um stund
 í kaldri kirkju

 Hlýða messu
 á framandi
 tungumáli

 Aðeins
 um stund

 VÆL Í MYRKRI

 Heyrir
 væl í myrkri

 Heldur
 að óvætt
 sé komin

 að
 ná í þig

 Finnur þá:

 hita í lofti

 svita á andliti

 og manst:
 lestarstöð skammt frá

 Í LJÓSASKIPTUNUM

 Söngur fuglanna
 í ljósaskiptunum

 ekki
 ætlaður mér

 Finnst þeir
 samt
 ávarpa mig

 Engan annan

 LJÓS Í FJARSKA

 Í fjarska
 ljós

 Þokumst
 hægt
 nær og nær

 uns
 í augu
 stingst

 sól

 SÓLARFLUG

 Gerðum okkur
 vængi

 úr
 hélunni
 á rúðunni

 Flugum
 á þeim
 til sólarinnar

 sem
 bræddi þá

 NÆTURFERÐ

 Á dökkum vegi

 bíll

 lýsir
 hvítan hóp

 Víkur ekki

 STEINAR Í LÓFA

 Vógum
 steina í lófa

 Þeyttum
 á haf út

 Af
 veikum mætti

 Í KOFA

 Dvel
 við vatnið

 í kofa
 áa minna

 Sit
 fyrir skrímslinu

 Líkt og
 forfeður mínir

 og
 afkomendur

 MORGUNVERK

 Halla mér
 smástund
 í sófann

 áður en

 fuglarnir
 kalla mig
 til morgunverka

 við hafið

 SJÓR

 Sjórinn
 á firðinum

 svo sléttur

 Í honum
 speglast myrkrið

 er
 augu mín
 renna til hafs

 SKIP

 Horfðum
 á skipið

 sigla
 inn í sólina
 að morgni

 og

 fögnuðum
 glerbrotinu
 í auganu

 VATN

 Á lygnu
 vatni
 liggur bátur

 Bíður þess
 að sigla

 milli skýja

 GÁRUR

 Vatnið gárast
 er minnst varir

 jafnvel í logni

 Þegar
 vatnabúinn
 byltir sér

 SIGLING

 Sigldum
 fyrir nesið

 og
 við okkur blasti
 hús

 í fjöruborðinu

 Höfðum
 ekki séð það áður

 þrátt fyrir
 ótal ferðir
Sækja PDF